Tweet

نقل زيزو عبده - القيادي بجبهة طريق الثورة - عبر صفحته على فيس بوك، نص شهادة الإعلامية ريم ماجد في أحداث مجلس الشورى التي أدلت بها أمام المحكمة اليوم.
وقالت ريم أمام المحكمة: "أنا أحد الداعين في الوقفة وعضوة في مجموعة لا للمحاكمات العسكرية، وشيرت الدعوة على حسابي في فيس بوك وتويتر والساعة 4 م وصلت مكان الواقعة على الرصيف أمام مجلس الشورى الساعة 4.30 سمعت حد بيقول: يلا والحقيقة اللي شوفته بعنيا إن الناس بدأت تتحرك وآخر واحد شوفته واقف جنبي نوبي".
وأضافت ريم: "اتحركت في الشارع اللي أمام المجلس وسمعت صوت قنابل غاز وشوفت مدرعة بتجري ورانا، وأنا ومجموعة دخلنا في ممر عشان نحمي نفسينا من الغاز، وفي الوقت ده دخل 2 ظباط علينا وخد واحد من الشباب وإحنا صرخنا بنقوله: بتاخده ليه قال: ناخدكوا معاه؟".
وأكملت: "بعدها كملنا ع الكورنيش وكان عندي اختناق، وقابلت سامية جاهين وكانت مضروبة وبتعيط وحكت إزاي اتقبض على البنات، وبعدها رحت قسم قصر النيل وشوفت هناك علاء ووالدته وروحنا قسم القاهرة الجديدة لما عرفنا إن الشباب والبنات اترحلوا على هناك".
وتابعت: "الوقفة كانت سلمية ومحدش ألقى طوب أو أي شيء والشرطة اعتدت على المتظاهرين، رجعت على محكمة عابدين عشان أقول شهادتي عن الواقعة كأحد الداعين للمظاهرة ومحدش سمع أقوالي، بعدها عرفت من زميل صحفي إن في بيان من الداخلية بيقول: إن الداخلية أفرجت عن البنات ووصلتهم واحدة واحدة لحد البيت وإحنا شايفنيهم مضروبين وجايين من الصحرا".